Ramesh soni riport
lakhanoo. uttar pradesh kee raajaneeti mein ek baar phir saamaajik sameekaranon ko saadhane kee kavaayad tej ho gaee hai. samaajavaadee paartee ne 15 maarch ko bahujan aandolan ke praneta kaansheeraam kee jayantee ko bade star par manaane kee taiyaaree shuroo kar dee hai. paartee is aayojan ko dalit samaaj tak apanee pahunch majaboot karane ke avasar ke roop mein dekh rahee hai.
samaajavaadee paartee adhyaksh akhilesh yaadav ne sabhee jila aur mahaanagar ikaiyon ko nirdesh jaaree kar jayantee kaaryakramon ko prabhaavee dhang se aayojit karane ko kaha hai. paartee sootron ke anusaar, har jile mein sangoshthee, vichaar goshthee aur sammaan samaaroh aayojit kar dalit samaaj ke logon ko badee sankhya mein jodane ka prayaas kiya jaega.
pd divas ke roop mein manaane kee taiyaaree
sapa is baar kaansheeraam jayantee ko ‘pd divas’ (pichhada, dalit, alpasankhyak) ke roop mein manaane kee rananeeti par kaam kar rahee hai. paartee ka maanana hai ki dalit aur pichhade vargon ka majaboot gathajod 2027 ke vidhaanasabha chunaav mein nirnaayak bhoomika nibha sakata hai.
raajaneetik vishleshakon ka kahana hai ki bahujan samaaj kee raajaneeti ke kendr mein rahe kaansheeraam ke naam par kaaryakram aayojit kar sapa dalit matadaataon ke beech apanee sveekaaryata badhaane ka prayaas kar rahee hai. vishesh roop se basapa ke kamajor hote janaadhaar ke beech sapa is avasar ko raajaneetik roop se mahatvapoorn maan rahee hai.
2027 kee rananeeti par phokas
samaajavaadee paartee kee rananeeti saaph taur par saamaajik sameekaranon ko majaboot karane kee hai. dalit, pichhade aur alpasankhyak vargon ke gathajod ko phir se sakriy kar paartee 2027 ke chunaavee ran kee taiyaaree mein jut gaee hai.
raajaneetik galiyaaron mein charcha hai ki kaansheeraam jayantee ke kaaryakramon ke jarie sapa jameenee star par sangathan ko sakriy karane ke saath-saath saamaajik sandesh dene kee bhee koshish karegee.
kul milaakar, 15 maarch ka aayojan sirph ek jayantee kaaryakram nahin balki 2027 ke chunaavee sameekaranon kee disha tay karane vaala raajaneetik sandesh bhee maana ja raha hai.
